O próximo 6 de novembro celebraremos a Conferencia Final do Proxecto BlueWWater en horario de 10.00 h a 17.00 h (GMT+1), nas instalacións do Centro Tecnolóxico do Mar – Fundación CETMAR. O evento terá formato híbrido permitindo a participación presencial e en liña.
A xornada terá como obxectivo a presentación dos principais resultados e logros alcanzados no proxecto, así como compartir as experiencias e coñecementos desenvolvidos polo consorcio nestes 3 anos de colaboración transfronteiriza.
Durante a xornada mostraranse, entre outros aspectos, as metodoloxías analíticas de alto rendemento para a avaliación de contaminantes, os resultados obtidos en mostras de augas superficiais e residuais urbanas, a avaliación do seu impacto ambiental e a eficacia de sistemas de tratamento convencionais e avanzados para mellorar a súa eliminación nas estacións depuradoras de augas residuais (EDAR).
A conferencia permitirá abrir un espazo de diálogo para o intercambio de experiencias entre os participantes, e profundará acerca dos retos actuais e futuros da xestión da calidade das augas, co obxectivo de avanzar cara a un uso máis sostible dos recursos hídricos.
O proxecto BlueWWater é un proxecto de cooperación transfronteiriza financiado polo Programa POCTEP de Cooperación Galicia-Norte de Portugal 2021-2027.
Inscrición de participantes: https://cetmar.org/seminarios/conferencia-final-bluewwater/
O programa da conferencia estará dispoñible en breve.